ԵՐԵՎԱՆ, ՄԱՅԻՍԻ 1, 24News
Արցախյան պատերազմից հետո Խծաբերդում տեղի ունեցած ողբերգական դեպքերի հետ կապված այսօր քննվում է Քննչական կոմիտեի կողմից դատարան ներկայացված միջնորդությունը` ՊՆ երկու սպաներին կալանավորելու մասով: Այս մասին NEWS.am-ին հայտնեց սպաների պաշտպան Հրանտ Վարդանյանը:
«Քննչական կոմիտեն չգիտենք ինչու որոշել է, որ այդ ամենի մեղավորը իմ պաշտպանյալներն են: Նրանք բացարձակ չեն կատարել որեւէ արարք, որի համար անձին կարելի է կանչել քրեական պատասխանատվության: Անձնվիրաբար ծառայել են հայրենիքին, երեւի էնտեղ չեն սպանվել, դրա համար են հիմա քրեական հետապնդման ենթարկվում»,- ասաց պաշտպանը` հիշեցնելով, որ Խծաբերդում պատերազմից հետո 9 հայ զինծառայող էր սպանվել և երկու հայ զինծառայող գերեվարվել էր հակառակորդի կողմից:
Պաշտպանը հայտնեց, որ փոխգնդապետ Ջիվան Մկրտչյանի մասով միջնորդության քննությունն ավարտվել է, դատարանը հեռացել է խորհրդակցական սենյակ վճիռ կայացնելու համար, իսկ մայոր Վլադիմիր Ղուկասյանի կալանավորման միջնորդության մասով նույնպես դեռ որոշումը չի հրապարակվել:
Հիշեցնենք, որ 2020 թվականի դեկտեմբերին հարուցվել էր քրեական գործ՝ Հադրութի շրջանի Հին Թաղեր և Խծաբերդ գյուղերի տարածքում տեղակայված մարտական դիրքերում 9 զինծառայողների սպանության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումների դեպքերի առթիվ:
--00--ԱՀ