Ադրբեջանական ինքնաթիռները շարունակում են իսրայելական ավիաբազայից բեռ տեղափոխել Բաքու

ԵՐԵՎԱՆ, ԱՊՐԻԼԻ 2, 24News

Ադրբեջանական Silk Way Airlines բեռնափոխադրող ավիաընկերության թռիչքները դեպի իսրայելական «Օվդա» ավիաբազա նորություն չեն, բայց առավել ուշագրավ է այս թռիչքների ինտենսիվության ու Բաքվի ռեժիմի ռազմական ագրեսիվ գործողությունների համընկնումը: Այս մասին հայտնում է Հետք-ը:

Այս հանգամանքը 2023 թ. մարտին արձանագրել էր իսրայելական Haaretz օրաթերթը՝ նկատելով, որ «Օվդան» Իսրայելի միակ աերոդրոմն է, որի միջոցով օդային ճանապարհով պայթուցիկներ են ներմուծվում այդ երկիր կամ այնտեղից արտահանվում: Իսկ Ադրբեջանը իսրայելական ռազմամթերքի հիմնական գնորդներից է, եւ Իսրայելը հատկապես 2016-ից հետո համարվում է Բաքվի ռեժիմի առանցքային ռազմական մատակարարը: 

Նախորդ հոդվածում անդրադարձել էինք 2016-2024 թթ. Silk Way Airlines-ի բեռնատարների՝ Իսրայելից դեպի Ադրբեջան թռիչքներին, որոնց թիվը կանոնավոր աճել է այն ժամանակ, երբ Ալիեւի ռեժիմը հերթական ռազմական ագրեսիան է սանձազերծել Արցախի եւ/կամ Հայաստանի դեմ:

Հատկանշական է, որ չնայած 2024 թվականը հայ-ադրբեջանական զինված բախումների առումով պասիվ տարի է եղել, այդուհանդերձ, 2020-ից հետո առաջին անգամ հենց նախորդ տարի է ադրբեջանական բեռնատարների՝ «Օվդայից» տարեկան թռիչքների թիվը հատել 20-ի շեմը: Եթե պատերազմական 2020-ին Silk Way Airlines-ի օդանավերը 26 անգամ էին «Օվդայից» թռել Ադրբեջան, ապա 2024-ին դա արել են 23 անգամ:

Նկատենք, որ հատկապես նախորդ տարեվերջին Ալիեւն ու նրա ենթակաները հերթական անգամ աչքի ընկան ագրեսիվ հռետորաբանությամբ, հակահայկական հայտարարություններով, սպառնալիքներով: Այդ ֆոնին պատահական չէր նաեւ «Օվդա» ավիաբազայից դեպի Ադրբեջան բեռնատար թռիչքների կտրուկ աճը: Միայն 2024 թ. դեկտեմբերին «Հետքն» արձանագրել է այդպիսի 6 չվերթ, այնինչ դրան նախորդած 11 ամիսների ընթացքում առավելագույն ամսական ցուցանիշը եղել է 4-ը (հուլիսին):

Մանրամասները՝ սկզբնաղբյուրում.