ԵՐԵՎԱՆ, ՆՈՅԵՄԲԵՐԻ 15, 24News
Քրեական ոստիկանության Շիրակի մարզային վարչությունում ստացվել էին օպերատիվ տեղեկություններ, որ 2012 թ. մինչ օրս Հառիճի միջնակարգ դպրոցի հաշվապահը և նրա ամուսինը Պետական եկամուտների կոմիտե ներկայացվող եկամտային հարկի ամենամսյա հաշվետվություններում չեն արտացոլել աշխատակիցների աշխատավարձերի գումարները, ինչի հետևանքով պետական բյուջե չեն վճարվել աշխատավարձերից գոյացած եկամտային հարկի գումարները, և պետությանը պատճառվել է առանձնապես խոշոր չափի վնաս:
Մեկ այլ դրվագով պարզվել է, որ ամուսինները տարբեր անհատ ձեռնարկատերերից կատարել են համակարգչային տեխնիկայի, շինարարական նյութերի և այլ տնտեսական ապրանքների գնումներ, որոնց մեծ մասը դպրոցը չի ստացել: Այս դրվագով ևս պատճառվել է խոշոր չափի նյութական վնաս:
Բացի այդ, պարզվել է, որ ամուսինը` Արթիկի թիվ 5 հիմնական դպրոցի հաշվապահը 2012 թվականից մինչ օրս եկամտային հարկի ամենամսյա հաշվետվություններում չի արտացոլել աշխատակիցներին վճարված աշխատավարձերի գումարները, ինչի հետևանքով չեն հաշվարկվել և պետական բյուջե չեն վճարվել կամ որոշ դեպքերում վճարվել են մասնակի` աշխատավարձերից գոյացած եկամտային հարկի, սոցիալական վճարների և կուտակային կենսաթոշակային գումարները՝ պետությանը պատճառելով խոշոր չափի վնաս:
Կազմված փաստաթղթերն ուղարկվել են ՀՀ հակակոռուպցիոն կոմիտե:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
--00—ՅՄ