ԱՄՆ-ն ներկայում ռազմական օգնություն չի մատակարարում Ուկրաինային. Թրամփ

ԵՐԵՎԱՆ, ՓԵՏՐՎԱՐԻ 26, 24News

ԱՄՆ-ն ներկայում ոչ մի ռազմական օգնություն չի ցուցաբերում Ուկրաինային: «Արմենպրես»-ի փոխանցմամբ՝ այս մասին հայտնել է ԱՄՆ նախագահ Դոնալդ Թրամփն Օվալաձև աշխատասենյակում լրագրողների հետ զրույցում։

«Հենց հիմա մենք ոչինչ չենք տրամադրում», - ասել է նա։

Միևնույն ժամանակ Թրամփը հնարավոր է համարել, որ Կիևին մարտական գործողությունները շարունակելու համար զենքը կբավականացնի այնքան ժամանակ, մինչև Ռուսաստանը և ԱՄՆ-ն համաձայնության հասնեն հակամարտության կարգավորման շուրջ։

Սպիտակ տան ղեկավարն ընդգծել է, որ ապագայում Կիևին տրամադրվող ռազմական օգնության համար պետք է պատասխանատվություն ստանձնի Եվրոպան։

Ավելի վաղ POLITICO թերթը գրել էր, որ առանց ամերիկյան աջակցության Ուկրաինան կզրկվի սպառազինությունների մոտավորապես կեսից, այդ թվում՝ ամենաարդյունավետներից։ The Wall Street Journal-ն իր հերթին կանխատեսում է, որ այս դեպքում Ուկրաինայի զինված ուժերը կկարողանան ներկայիս տեմպով կռվել միայն մինչև ամառ, իսկ հետո առանց զինամթերքի մնալու վտանգի կենթարկվեն՝ կորցնելով մի քանի տեսակի առաջադեմ սպառազինություն կիրառելու և հեռահար հարվածներ հասցնելու հնարավորությունը։