ԵՐԵՎԱՆ, ԱՊՐԻԼԻ 17, 24News
Շամիրամ գյուղի գերեզմանատանը կից սգո սրահում չորս անձի սպանության համար Թելման Քալաշյանը դեպքից ութ տարի անց դատապարտվեց ցմահ ազատազրկման։ Արագածոտնի մարզի ընդհանուր իրավասության դատարանը՝ դատավոր Սուրեն Մնոյանի նախագահությամբ, հրապարակել է դատավճիռը՝ մեղավոր ճանաչելով Թելման Քալաշյանին և դատապարտելով ցմահ ազատազրկման։ Այս մասին 24News-ը տեղեկացավ փաստաբան Լուսինե Սահակյանից։
Նշենք, որ մեղադրյալ Թելման Քալաշյանն այս ութ տարիների ընթացքում այդպես էլ չի զղջացել կատարվածի համար, ավելին՝ առ այս պահը պարբերաբար բարձրաձայնում է գումարային պահանջների մասին։
Հիշեցնենք, որ ըստ մեղադրանքի՝ Թելման Քալաշյանը 2017-ի օգոստոսի 1-ին Շամիրամ համայնքի գերեզմանատանը կից սգո սրահում ապօրինի ձեռք բերված հրազենով սպանել է 4 մարդու, ևս 7-ը ստացել են տարբեր աստիճանի մարմնական վնասվածքներ։ Դեպքից հետո Թելման Քալաշյանը դիմել է փախուստի, որի ընթացքում կրակոցներ է արձակել նաև իր փախուստը կանխելու և բռնելու նպատակով իրեն հետապնդող քաղաքացու նկատմամբ, ով ականատես էր եղել սգո սրահում կատարված ողբերգությանը։ Այդպիսով՝ Թելման Քալաշյանին մեղադրանք է առաջադրվել ՀՀ նախկին ՔՕ 104-րդ հոդվածի 2-րդ մասի 1-ին և 6-րդ կետերով, 235-րդ հոդվածի 1-ին մասով և 34-104-րդ հոդվածի 1-ին մասով։
Մերի Մանուկյան
--00--ԱՀ