ԵՐԵՎԱՆ, ԱՊՐԻԼԻ 11, 24News
Հայաստանի մայյրաքաղաքում անցան ռուսական թատերական մշակույթին նվիրված միջոցառումներ։ Երևանում Մոսկվայի տան բեմում երեք օր շարունակ դպրոցականները, ուսանողները, անվանի արվեստագետները ներկայացրել են Գոգոլի, Կուպրինի, Շեքսպիրի և այլ դասականների ստեղծագործությունների իրենց բեմական մեկնաբանությունները։
Միջոցառումը կազմակերպել էին Մոսկվայի կառավարությունը, Մոսկվայի արտաքին տնտեսական և միջազգային կապերի վարչությունը, Մոսկվայի հայրենակիցների տունը և Երևանում Մոսկվայի տունը։ Կազմակերպիչների խոսքով, իրենց նպատակն էր սերմանել հետաքրքրություն բեմական արվեստի նկատմամբ, աջակցել թատերական երիտասարդությանը: «Ռուսական թատերական դպրոցը հայտնի է ամբողջ աշխարհում: Դերասանների և ռեժիսորների սերունդները կրթվում են Ստանիսլավսկու, Չեխովի, Վախթանգովի համակարգերով: Եվ հայ արտիստները բացառություն չեն: Մեր փառատոնը ոչ միայն օգնում է ավելի լավ ճանաչել ռուսական թատերական դպրոցը, այլև հնարավորություն է ընձեռում ցուցադրել ձեր հմտությունները, ինչպես նաև շփվել մյուսների հետ, տեսնել, թե ինչպես են աշխատում գործընկերները և խորհուրդներ ստանալ թատերարվեստի վարպետներից»,- նշեց Երևանում Մոսկվայի տան տնօրեն Հայկ Մելիքյանը։
Մանկապատանեկան թատերական փառատոնը բացվեց ապրիլի 8-ին կատարողական արվեստի մարաթոնով: Ռուս և համաշխարհային դասականների ստեղծագործությունների ժամանակակից բեմական մեկնաբանությունները ներկայացրեցին մանկական թատերական ստուդիաների սաները և բուհերի ուսանողները:
Երևանի մնջախաղի պետական թատրոնի գեղարվեստական ղեկավար, ՀՀ վաստակավոր արտիստ Ժիրայր Դադասյանը ընդգծեց նման միջոցառումների կարևորությունը՝ երիտասարդներին թատերական արվեստին ծանոթացնելու համար։ «Աչքերով չես տեսնի» ներկայացման մեջ Թատերական ինստիտուտի մնջախաղի կուրսի ուսանողներն են, որը բացվել էր հատուկ խուլ և համր ուսանողների համար: Անցյալ տարի պիեսը բուռն արձագանքի արժանացավ Մոսկվայում կայացած «ԳԻՏԻՍ-Մաստեր կլասս» ԱՊՀ թատերական փառատոնում: Աշխատանքի բերումով ես եղել եմ շատ երկրներում, բայց երբեք չեմ հանդիպել արվեստի այնպիսի ընկալման, ինչպիսին Ռուսաստանում է: Ուստի ես շատ եմ արժևորում իմ կապերը Ռուսաստանի, Մոսկվայի, ինչպես նաև Երևանում Մոսկվայի տան հետ»,- ընդգծեց նա։
Ապրիլի 9-ին Երևանում Մոսկվայի տան բեմում թատերական ստուգատեսի շրջանակներում Ստանիսլավսկու անվան ռուսական դրամատիկական թատրոնի արտիստները ներկայացրեցին ժամանակակից իտալացի դրամատուրգ Գասպարե Դորիի պիեսի հիման վրա բեմադրված «Փղերի երկար ճանապարհորդությունը» պիեսը։
Ապրիլի 10-ին «Մետրո» թատերական ստուդիայի մանկապատանեկան ստուդիայի սաները ցուցադրեցին «Կարևորը՝ ձանձրալի չլինի» ներկայացումը։ Լեոնիդ Ենգիբարովի 90-ամյակին նվիրված բեմադրությունը հարգանքի տուրք է հանճարեղ արվեստագետին և գրողին, ում ստեղծագործությունը հայ-ռուսական մշակութային երկխոսության վառ օրինակ է։
«Կարծում եմ՝ մեզ հաջողվել է ստեղծել լեգենդար մնջախաղացի նովելների հիման վրա մի ամբողջական բեմադրություն, որտեղ խոսում է արտիստների և՛ հոգին, և՛ մարմինը՝ Ենգիբարովի պլաստիկային և հումորին համապատասխան: Արտիստի միայնության զգացումը փոխանցելով հանդերձ մենք ցանկացել ենք բեմից կոչ անել չդադարել երազել և հետևել երազանքին: Շնորհակալ ենք, որ մեզ հրավիրելեն հանդես գալու այս փառատոնին»,- մեզ հետ զրույցում ընդգծեց ներկայացման ռեժիսոր, «Մետրո» թատերական ստուդիայի մանկապատանեկան ստուդիայի ղեկավար Սոնա Մարտիրոսյանը։
Ցուցադրություններից հետո տեղի ունեցավ ներկայացումների քննարկում ՀՀ վաստակավոր արտիստ, դերասան և ռեժիսոր Ռոբերտ Հակոբյանի, ՀՀ վաստակավոր արտիստ, Երևանի Ստանիսլավսկու անվան ռուսական թատրոնի դերասանուհի Վերոնիկա Սարոյանի և թատերագետ Մարիամ Նավոյանի մասնակցությամբ։
Թատրոնի օրերն ավարտվեցին Մանկապատանեկան թատերական փառատոնի մասնակիցներին դիպլոմների ու նվերների հանձնմամբ։ Ժյուրին լավագույն ներկայացում ընտրեց Երևանի թատրոնի և կինոյի պետական ինստիտուտի մնջախաղի հատուկ դասընթացի «Աչքերով չես տեսնի» բեմադրությունը։
Դիպլոմներ ստացավ նաև Շառլ Ազնավուրի անվան մշակույթի և արվեստի քոլեջի ուսանողական թատրոնը (լավագույն բեմանկարչություն), Չեխովի անվան դպրոցական թատրոնը (լավագույն դերասանական անսամբլ), Երևանի թատրոնի և կինոյի ինստիտուտի 1-ին կուրսի ուսանող և Շառլ Ազնավուրի անվան մշակույթի և արվեստի քոլեջի շրջանավարտ Գագիկ Խաչատրյանը (լավագույն դերասանական կերպարի ուսումնասիրություն), Միգրան Արփի ստուդիան (լավագույն ինտերպրետացիա), Երևանում Մոսկվայի Լոմոնոսովի անվան պետական համալսարանի մասնաճյուղի «Նախաձեռնությունը պատժելի է» թատերական ստուդիան(ռուս գրականության նկատմամբ հոգատար վերաբերմունքի համար)։
--00—ՅՄ