ԵՐԵՎԱՆ, ՀՈԿՏԵՄԲԵՐԻ 21, 24News
Այսօր՝ հոկտեմբերի 21-ին FAF երկրպագուական շարժման հիմնադիր Սերգեյ Ջանջոյանը ՀՖՖ-ի շենքի դիմաց վերահաստատել է Հայաստանի ֆուտբոլի ֆեդերացիայի վերնախավի հրաժարականի պահանջը՝ ներկայացնելով FAF-ի և հայկական ֆան ակումբների հայտարարություն-ուղերձը:
«Մոտ 10 օր առաջ պահանջեցինք ՀՖՖ նախագահի հրաժարականը, տևական ժամանակ սպասել ենք հրաժարականի պահանջի պատասխանին։ Հեղափոխությունից հետո ձևավորվել էր մշակույթ, երբ հանրային պահանջի, երկրպագուների պահանջի դեպքում ձախողած ֆեդերացիան պետք է հեռանա։ Մենք վերահաստատում ենք մեր դիրքորոշումը այս հարցի վերաբերյալ։ Ցանկանում ենք հայտնել, որ այսուհետ լինելու են գործողություններ ազգային հավաքականի հանդիպումների ժամանակ»,- նշել է Ջանջոյանը։
Հիշեցնենք՝ այսօր ՀՖՖ նախագահ Արմեն Մելիքբեկյանը հանդես եկավ պաշտոնական հայտարարությամբ՝ անդրադառնալով երկրպագուների կողմից իր հրաժարականի վերաբերյալ պահանջին:
«Այս պահին, որքան էլ գայթակղիչ թվա հրաժարականով հեռանալու և այս ծանր բեռից ազատվելու հնարավորությունը, ես ավելի մտահոգ եմ գալիք կարևորագույն տարվա անելիքներով, կիսատ գործերը ավարտելու պատրաստակամությամբ և ապագայի ծրագրերը և նպատակները քննարկման արդյունքում ձևավորելու ցանկությամբ»,- ասվում էր Արմեն Մելիքբեկյանի հայտարարության մեջ:
--00—ԱՊ