ԵՐԵՎԱՆ, ՀՈՒԼԻՍԻ 25, 24News
Ռուսաստանի Դաշնության նախագահի օգնական Նիկոլայ Պատրուշևը հայտարարել է, որ Մոսկվան չի միջամտում այլ պետությունների ներքին գործերին։
«Արմենպրես»-ի հաղորդմամբ՝ ՌԴ նախագահի օգնականը հայտարարել է «Ռուսական թերթ»-ին տված հարցազրույցում՝ անդրադառնալով Միացյալ Նահանգներում տեղի ունենալիք նախագահական ընտրությունների վերաբերյալ հարցին։
«ԱՄՆ-ի նախագահական ընտրությունները Միացյալ Նահանգների ներքին գործն են։ Ամերիկացի ընտրողներն իրենք կորոշեն, թե ով է, իրենց կարծիքով, արժանի գործիչ՝ կառավարելու համար իրենց երկիրը։ Ռուսաստանը չի խառնվում այլ պետությունների ներքաղաքական կյանքին։ Ի տարբերություն Վաշինգտոնի, որն այլ երկրների ներքին գործերին միջամտությունը դիտարկում է իր արտաքին քաղաքականության սովորական բաղկացուցիչ», - ասել է Պատրուշևը։
Վերջինս հավելել է, որ ԱՄՆ-ում ընտրությունների գործընթացում փոփոխություններ է տեսնում, և Ռուսաստանի համար կարևոր է, որ Վաշինգտոնն է վճռորոշ ազդեցություն ունենում Ուկրաինայի վարքագծի վրա։
«Լրջագույն նշանակություն ունի նաև այն, թե ինչպես է Միացյալ Նահանգները շարունակելու ազդել ուկրաինական ռեժիմի վրա», - ընդգծել է նախագահի օգնականը։
--00—ԼՀ