Հովհաննավանք վանական համալիրում կատարվել է Մեծ Պահքի հինգերորդ միասնական ժամերգությունը

ԵՐԵՎԱՆ, ԱՊՐԻԼԻ 4, 24News

;;
Շարունակելով քայլել Մեծ Պահքի խորհրդավոր ճանապարհով, Արագածոտնի թեմն այսօր միատեղվել էր Հովհաննավանք վանական համալիրում:
 
Հանդիսապետությամբ Թեմակալ Առաջնորդ Գերաշնորհ Տեր Մկրտիչ եպիսկոպոս Պռոշյանի, մասնակցությամբ թեմի հոգևոր դասի, վանականների, տարբեր համայնքներից Հովհաննավանք եկած ուխտավորների և երիտասարդաց միության անդամների,
Հովհաննավանք վանական համալիրում կատարվեց Մեծ Պահքի հինգերորդ միասնական ժամերգությունը:
Հոգևոր դասին և հավատացյալներին, այսօր ժամերգությանն աղոթակից էին նաև «Դանիական-հայկական բարեգործական առաքելություն» ՀԿ անդամները:
 
Ժամերգության ավարտին Արուճի հովվության հոգևոր հովիվ՝ Արժանապատիվ Տեր Մանուկ քահանա Զեյնալյանն անդրադարձավ առաջիկա Գալստյան կիրակիի խորհրդին:
 
Տեր Հայրն անդրադառնալով օրվա խորհրդի կարևորությանը յուրաքանչյուր քրիստոնյայի կյանքում, նշեց. «Քրիստոնյաներիս ամբողջ կյանքը փնտրտուքի կյանք է, մենք փնտրում ենք Քրիստոսին, որպեսզի երբ գա օրը Տիրոջ առաջ կանգնելու, պարզ երեսով կանգնենք»:
 
Ժամերգությունն ավարտվեց Սրբազան Հոր պահպանիչ աղոթքով:

--00—ՍՊ