ԵՐԵՎԱՆ, ՄԱՅԻՍԻ 8, 24News
Եվրոպայի խոշորագույն փողոցային կառնավալը, որն անցկացվում է Լոնդոնի Նոթինգ Հիլլ շրջանում, չեղյալ են հայտարարել COVID-19 համաճարակի պատճառով: Այս մասին հայտնել են կազմակերպիչները, փոխանցում է Independent-ը:
Այս կառնավալը չեղյալ է հայտարարվել 54 տարվա ընթացքում առաջին անգամ։
Ինչպես հաղորդում է Notting Hill Carnival LTD-ն, որոշումն ընդունվել է «ռազմավարական գործընկերների և խորհրդատվական խորհրդի հետ երկարատև խորհրդակցություններից հետո»:
Պաշտոնական հայտարարության մեջ նշված է. «Notting Hill-ի կառնավալը հիմնված է դժվար ժամանակներում մարդկանց միավորելու համար, և մենք մտադիր ենք պահպանել այդ ավանդույթը»:
Կազմակերպիչները նաև հայտնել են, որ աշխատանքներ են տարվում NHC 2020-ի այլընտրանքային, առցանց ստեղծման ուղղությամբ:
Նշենք, որ ամենամյա կառնավալին մասնակցում է ավելի քան երկու միլիոն մարդ: