ԵՐԵՎԱՆ, ՀՈԿՏԵՄԲԵՐԻ 28, 24News
Հայաստանի մի շարք մանկապատանեկան պարախմբեր մասնակցել են Երևանում Մոսկվայի տանն առաջին անգամ անցկացված Ռուսական ժողովրդական պարերի փառատոնին։ Միջոցառումը կազմակերպել էին Մոսկվայի կառավարությունը, Մոսկվա քաղաքի արտաքին տնտեսական և միջազգային կապերի վարչությունը, Մոսկվայի հայրենակիցների տունը և Երևանում Մոսկվայի տունը։
«Մեր այսօրվա փառատոնի գլխավոր ուղերձը, իհարկե, բարեկամությունն է։ Շատ կարևոր է երեխաներին մանկուց ծանոթացնել այլ ազգերի մշակույթին և, վստահ եմ` այդ դեպքում կյանքը Երկրի վրա ավելի գեղեցիկ ու լավը կդառնա։ Զուր չէ, որ մեր փոքրիկ արտիստները ներկայացրեցին հայկական և ռուսական պարեր, ինչպես նաև այլ ազգերի պարարվեստը։ Կարծում եմ՝ հանդիսատեսի ջերմ ընդունելությունն ու նրանց տևական ծափերը մեզ կխրախուսեն շարունակել համագործակցությունը Երևանում Մոսկվայի տան հետ»,- մեզ հետ զրույցում ասաց փառատոնի գեղարվեստական ղեկավար Արթուր Զաքարյանը։
«Նանե» պարային ստուդիան փառատոնին ներկայացրեց «Սիբիրյան պար» և «Աշխարհի երեխաները» համարները։ Ստուդիայի գեղարվեստական ղեկավար Նարինե Թոփալյանն ընդգծեց, որ նման միջոցառումներին մասնակցելը այլ ազգերի մշակույթի նկատմամբ հարգանք ցուցաբերելու հնարավորություն է։ «Մենք շատ ուշադիր ենք վերաբերվում այլ ժողովուրդների արվեստի հանդեպ և փորձում ենք այն հնարավորինս մոտ ներկայացնել բնօրինակին։ Այդ առումով շատ օգտակար էր մեր մասնակցությունը միառժամանակ առաջ Մոսկվայում անցկացված պարային մրցույթին, որտեղ ես նաև վարպետության դասեր առա Իգոր Մոիսեևի անվան պարարվեստի դպրոց-ստուդիայում։ Նշեմ նաև, որ մենք երբեք առիթը բաց չենք թողնում մասնակցելու նման միջոցառումներին, հատկապես, երբ դրանք անցկացվում են Երևանում Մոսկվայի տան կամ ռուսական այլ կազմակերպությունների կողմից, քանի որ դրանք աչքի են ընկնում կազմակերպվածությամբ և մակարդակով»,- մեզ հետ զրույցում ընդգծեց նա։
Փառատոնին ռուսական ժողովրդական պարերից բացի ներկայացվեցին նաև հայկական պարեր։ «Մենք որոշեցինք հարգանքի տուրք մատուցել մեր հայրենի մշակույթին, ինչը մեծ ոգևորությամբ ընդունվեց»,- ասաց փառատոնի գեղարվեստական ղեկավարը։
Ամփոփելով միջոցառումը և մասնակիցներին շնորհակալագրեր հանձնելով՝ Երևանում Մոսկվայի տան կառավարիչ Հայկ Մելիքյանն ընդգծեց, որ Մոսկվայի Հայրենակիցների տուն պետական ինքնավար հիմնարկի մասնաճյուղը միշտ պատրաստակամ է աջակցելու այն նախաձեռնություններին, որոնք նպաստում են նոր տաղանդների բացահայտմանը, մատաղ սերնդի զարգացմանը ու հայ և ռուս ժողովուրդների միջև բարեկամության ամրապնդմանը։
--00—ՅՄ