ԵՐԵՎԱՆ, ՀՈՒՆՎԱՐԻ 31, 24News
«Ալ-Նասրի» պորտուգալացի հարձակվող Կրիշտիանու Ռոնալդուն հայտարարել է Մադրիդի «Ռեալ» վերադառնալու պատրաստակամության մասին։ Միաժամանակ, պորտուգալացին հասկացրել է, որ եթե վերադառնա մադրիդյան ակումբ, ապա դա այլևս չի լինի որպես ֆուտբոլիստ։
Լրագրող Էդու Ագիրեն Ռոնալդուին հարցրել է՝ արդյոք նա կարող է վերադառնալ Մադրիդի «Ռեալ»։ Պորտուգալացու պատասխանը հետևյալն էր:
««Ռեալում» անցկացրած ժամանակաշրջանն ինձ համար ամենաերջանիկն էր ֆուտբոլային առումով։ Միգուցե ինչ-որ բան տեղի ունենա կարիերաս ավարտելուց հետո»,- 39-ամյա Ռոնալդուի խոսքերն է մեջբերում Goal-ը։
Նշենք, որ Ռոնալդուն Մադրիդի «Ռեալում» հանդես է եկել 2009-2018 թվականներին։ Այդ ընթացքում պորտուգալացին անցկացրել է 438 պաշտոնական հանդիպում, որոնցում «արքայական» ակումբի կազմում դարձել է 450 գոլի և 131 գոլային փոխանցման հեղինակ։
Աղբյուրը՝ Armsport.am:
--00—ՅՄ