ԵՐԵՎԱՆ, ՓԵՏՐՎԱՐԻ 14, 24News
Ռուսաստանցի Ալեքսանդր Վիննիկը ժամանել է հայրենիք՝ բանտարկյալների փոխանակման շրջանակներում ԱՄՆ-ի կողմից ազատ արձակվելուց հետո: «Արմենպրես»-ի փոխանցմամբ՝ այս մասին «Ինտերֆաքս» գործակալությանը հայտնել են ավիացիոն ծառայություններում:
«Մոսկվայում վայրէջք է կատարել Ստամբուլից ժամանած ինքնաթիռը, որի մեջ եղել է ուղևոր Ալեքսանդր Վիննիկը», - ասել է գործակալության զրուցակիցը։
Վիննիկին Ռուսաստանի Դաշնություն է բերել ամերիկյան կառավարությանը պատկանող ինքնաթիռը:
Ինքնաթիռից իջելուց հետո թռիչքավայրէջքային գոտում նրան դիմավորել է մի քանի մարդ։
Ալեքսանդր Վիննիկին ԱՄՆ-ն փոխանակել է ՌԴ-ում ձերբակալված Մարկ Ֆոգելի հետ, որը հայրենիք է վերադարձել փետրվարի 11-ին։
Վիննիկը Միացյալ Նահանգների պահանջով ձերբակալվել էր 2017 թ. հուլիսի 25-ին Հունաստանում։ ԱՄՆ-ն նրան մեղադրում էր 4-9 միլիարդ դոլարի լվացման մեջ այժմ գոյություն չունեցող կրիպտոարժույթների BTC-e ինտերնետ բորսայի միջոցով: Նա ԱՄՆ էր արտահանձնվել 2022 թ. օգոստոսին։
--00--ԱՀ