ԵՐԵՎԱՆ, ՄԱՐՏԻ 5, 24News
Վազգեն Սարգսյանի 66-ամյակի օրը հիշում և հարգում ենք նրան՝ հայրենասեր մարդ, ռազմական ու պետական գործիչ, որի վառ կերպարը շարունակում է ոգեշնչել սերունդներին, ընդամենը մի քանի բացառությամբ։ Այս մասին գրում է ՀՀ ԱԳ նախկին նախարար Վարդան Օսկանյանը։
«Վազգենը ավելին էր, քան պարզապես առաջնորդ. նա մարմնավորում էր հայ ժողովրդի դիմացկունությունը, խիզախությունը և անսասան կամքը։ Նրա իմաստությունը, ռազմավարական հեռատեսությունը և խորը սերը հայրենիքի հանդեպ նրան դարձրին անփոխարինելի ոչ միայն որպես հրամանատար ու պետական գործիչ, այլև որպես առաջնորդող ուժ Հայաստանի ժամանակակից պատմության մեջ։ Նա դարձել էր միասնության և ուժի խորհրդանիշ, առաջնորդ, որը ղեկավարում էր ոչ թե հետևից, այլ առաջնագծում՝ թե՛ մարտի դաշտում, թե՛ պետականաշինության գործում։
Թեև Վազգենի կյանքը ողբերգականորեն կարճ եղավ, նրա ժառանգությունը շարունակվում է։ Նրա բացակայության դատարկությունը խորապես զգացվում է, և այսօր, առավել քան երբևէ, մեր ազգը պետք է վերածնվի նրա անմահ ոգով, դիմացկունությամբ և վճռականությամբ։ Միայն այդպես կարող ենք հաղթահարել մեր առջև ծառացած ներքին և արտաքին բազմաթիվ մարտահրավերները, վերականգնել մեր կորուստները և վերահաստատել մեր արժանապատվությունը»։
--00—ՅՄ