ԵՐԵՎԱՆ, ՀՈՒՆՎԱՐԻ 5, 24News
«Ես Երևանում եմ, սպասում եմ բանակցությունների մեկնարկին, «Դավիթ Մինասյան» դաշինքի ավագանու անդամ Էմին Երիցյանի միջնորդությամբ հեռախոսահամար է փոխանցվել ինձ, որպեսզի «Քաղաքացիական պամանագիր» կուսակցության թեկնածու Լյուդվիգ Գյուլնազարյանի և «Դավիթ Մինասյան» դաշինքի թեկնածու Դավիթ Մինասյանի թեկնածուների հետ բանակցություններ ընթանան, դեռևս չենք հանդիպել»,- այս մասին 24News-ին տեղեկացրեց Փարաքարի համայնքապետի թեկնածու ընտրված Վալոդյա Գրիգորյանը:
Նշենք, որ այսօր՝ հունվարի 5-ին, Փարաքար համայնքի ավագանին իր անդրանիկ նիստն էր հրավիրել, օրակարգում համայնքապետի ընտրության հարցն էր, սակայն նիստը չկայացավ ավագանու չներկայանալու պատճառով:
Դեկտեմբերի 5-ին կայացած ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ, և 10 ձայնով իրենց թեկնածուն՝ Վոլոդյա Գրիգորյանը, ընտրվել է համայնքի ղեկավար, որից հետո եկել էին ավագանու մնացած 11 անդամները, և 11 ձայնով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաեւ ՔՊ-ի անդամները: Արդյունքում երկու ուժերը պնդում են, որ համայնքապետ է ընտրվել իրենց թեկնածուն:
Նշենք նաև, որ Դավիթ Մինասյանը հայց էր ներկայացրել դատարան՝ ընտրությունների արդյունքները անվավեր ճանաչելու պահանջով: Վարչական դատարանը որոշման համաձայն՝ Փարաքար համայնքի ղեկավարի ընտրությունների արդյունքները անվավեր են ճանաչվել։
Հարցին, թե հնարավո՞ր է Դավիթ Մինասյանի օգտին որոշում կայացվի և նա դառնա համայնքապետ, Վոլոդյա Գրիգորյանը պատասխանեց. «Ո՛չ, ժողովրդի պահանջն է եղել, որ ես ընտրվեմ, և դա բարձր տեղում պետք է լինի, շատ ձայն հավաքած ուժը պետք է ղեկավարի, երկրորդ տեղ գրաված ուժը օգնի առաջին տեղ գրավածին, երրորդ ուժին էլ օգնեն այդ երկուսը, դա կստեղծի ժողովրդի համար համերաշխության բարձր աստիճան»:
Վոլոդյա Գրիգորյանը չբացառեց, որ հնարավոր է երկրորդ անգամ ընտրություն նշանակվի, և պարզաբանեց, որ ավագանու այսօրվա նիստին չմասնակցելու պատճառը համայնքում համերաշխության ֆոնը պահպանելն էր, այլապես կարող էին տարաձայնություններ լինել:
Հերմինե Միքայելյան
--00—ԼՄ