ԵՐԵՎԱՆ, ՀՈՒՆՎԱՐԻ 10, 24News
ՀՀԿ երիտասարդական կազմակերպության նախագահ Հենրիխ Դանիելյանը գրում է․
«Նիկոլ Փաշինյանի իշխանությունը շարունակում է կործանարար քաղաքականությունը, որը քայլ առ քայլ քանդում է Հայաստանի պետականության հիմքերը։ Նրանք արդեն քայքայել են մեր հզոր բանակի մեծ մասը, խարխլել ազգային արժեհամակարգը, անտեսել անվտանգության և դիվանագիտության առանցքային հենասյուները։ Արցախը հանձնվեց, իսկ Հայաստանի սուվերեն տարածքները մաս առ մաս կորցնում են իրենց պետական պատկանելությունը։
Փաշինյանի կառավարությունը ոչ միայն ձախողել է երկրի կենսական ուղղությունների զարգացումը, այլև նպաստել է Հայաստանի դիմադրողականության ամբողջական անկմանը՝ ապահովելով հայ ժողովրդի շահերին չհամապատասխանող գործընթացներ։ 2025 թվականը, նրանց համար կարծես հայտարարվում է որպես տնտեսության և անվտանգության վերջնական անկման տարի։
Այսօր նրանք նախաձեռնել են Հայաստանի համար կործանարար նոր օրակարգ՝ ԵՄ անդամակցության հարցը, որը հղի է ծանր հետևանքներով։ Հայաստանը չի կարող լինել միաժամանակ և՛ ԵՄ, և՛ ԵԱՏՄ լիիրավ անդամ։ Նիկոլ Փաշինյանի ապաշնորհ կառավարման արդյունքում կործանվում է այն ամենը, ինչը տարիներ շարունակ ստեղծվել է դիվանագիտական խելամիտ և բալանսավորված քաղաքականությամբ։
ԵԱՏՄ-ի հետ հարաբերությունների կրճատումը կհանգեցնի էներգակիրների և պարենային ապրանքների գների կտրուկ աճի, իսկ հայկական ապրանքների արտահանումը կկրճատվի մինչև 80%-ով։ Հայաստանի գործարար հատվածի մեծ մասը կսնանկանա, և այդ ամենի միակ «հաջողությունը» կլինի այն, որ նրանք կկարողանան իրենց սննանկության փաստը դիմավորել, օրինակ, Բարսելոնայում կամ Նեապոլում՝ ԵՄ առանց վիզայի համակարգի շնորհիվ»։
--00—ՍՊ