ԵՐԵՎԱՆ, ՕԳՈՍՏՈՍԻ 24, 24News
Գերմանիայում դանակով հարձակում է տեղի ունեցել Քաղաքի օրվա տոնակատարության ժամանակ, ինչի հետևանքով զոհվել է երեք մարդ, ևս ութը վիրավորվել։ Այս մասին հայտնում է Spiegel-ը։
Գերմանական Զոլինգեն քաղաքում, որտեղ ուրբաթ օրը նշվել է 650-ամյակը, անհայտ անձը դանակով հարձակվել է ներկաների վրա երեկոյան 21:30-ի սահմաններում: Երեք մարդ անմիջապես մահացել է, ևս ութը վիրավորվել են, որոնցից հինգի վիճակը ծանր է։
Հաղորդվում է, որ հարձակվողը դիտավորյալ հարվածներ է հասցրել քաղաքացիների պարանոցի շրջանում։ Բոլոր տուժածները տոնակատարությունների մասնակիցներ են։
Հարձակվողին հաջողվել է փախչել դեպքի վայրից, և որոնողական աշխատանքները շարունակվում են։ Քաղաքը շրջափակված է իրավապահների կողմից, և ամենուր կարելի է տեսնել շտապ օգնության մեքենաներ:
--00—ՅՄ