ԵՐԵՎԱՆ, ԴԵԿՏԵՄԲԵՐԻ 13, 24News
Ռուսաստանը համաձայնել է Սուրբ Ծննդյան կապակցությամբ գերիների փոխանակում կատարել Ուկրաինայի հետ, իսկ Ուկրաինան մերժել է, սակայն դրա հույսը դեռ չի մարել։ Ինչպես «Արմենպրես»-ը տեղեկանում է ՏԱՍՍ-ից, այս մասին հայտարարել է Հունգարիայի վարչապետ Վիկտոր Օրբանը Kossuth ռադիոկայանի առավոտյան հաղորդման եթերում։
Հունգարիայի վարչապետը հիշեցրել է, որ դեկտեմբերի 11-ին ՌԴ նախագահ Վլադիմիր Պուտինի հետ հեռախոսով քննարկել է «սուրբծննդյան հրադադարի» և Ռուսաստանի և Ուկրաինայի միջև գերիների լայնածավալ փոխանակման հնարավորությունը։ Այնուհետև Հունգարիան դիվանագիտական ուղիներով իր նախաձեռնությունը ներկայացրել է Ուկրաինային, սակայն նախագահ Վոլոդիմիր Զելենսկին մերժել է այդ առաջարկը։ Նույն օրը Օրբանը հրապարակավ հիասթափություն էր հայտնել այս առնչությամբ։
«Մի կողմը համաձայնել է, մյուսն, ըստ երևույթին, հրաժարվել է, բայց հավանականությունը դեռ մնում է», - ասել է Օրբանը ռադիոկայանի եթերում:
Նա նշել է, որ հակամարտող կողմերի միջև գերիների լայնամասշտաբ փոխանակումը «կարող է ուրախացնել հարյուրավոր կամ հազարավոր մարդկանց»։
Ավելի վաղ Կրեմլի խոսնակ Դմիտրի Պեսկովը նույնպես հայտնել էր, որ Մոսկվան անմիջապես արձագանքել է Օրբանի նախաձեռնությանը, սակայն Կիևը մերժել է այն։
--00—ԼՀ