ԵՐԵՎԱՆ, ՄԱՐՏԻ 14, 24News
Մեծ յոթնյակի (G7) երկրները կարող են խստացնել պատժամիջոցային ճնշումը Ռուսաստանի վրա, եթե Մոսկվան հրաժարվի Ուկրաինայում 30-օրյա հրադադարի առաջարկից։ «Արմենպրես»-ի հաղորդմամբ՝ այս մասին հայտնում է Reuters գործակալությունը՝ վկայակոչելով Քվեբեկում կայացած G7-ի արտգործնախարարների հանդիպման ամփոփիչ կոմյունիկեի նախագիծը։
Նշվում է, որ անդամ պետությունները քննարկել են Ռուսաստանի նկատմամբ նոր պատժամիջոցներ սահմանելու հնարավորությունը՝ որպես պատասխան Մոսկվայի՝ հրադադարի չգնալու դեպքում։
Փաստաթղթում նշվում է, որ G7-ը պատրաստ է Ռուսաստանի համար «ավելացնել ծախսերը», եթե հրադադարի շուրջ բանակցությունները չբերեն ցանկալի արդյունք։
G7-ի կազմում ընդգրկված են ԱՄՆ-ն, Կանադան, Մեծ Բրիտանիան, Գերմանիան, Ֆրանսիան, Իտալիան և Ճապոնիան։ Խումբը վերջին տարիներին բազմիցս խստացրել է տնտեսական և քաղաքական սահմանափակումները Ռուսաստանի նկատմամբ՝ ի պատասխան Ուկրաինայում պատերազմի։
--00—ՅՄ