Թբիլիսիի քաղաքապետը ցանկանում է վերակազմավորել քաղաքային ծառայությունները

ԵՐԵՎԱՆ, ՀՈՒՆՎԱՐԻ 28, 24News

Թբիլիսիի քաղաքապետ Կախա Կալաձեն, որ նաև «Վրացական երազանք» կուսակցության գլխավոր քարտուղարն է, ցանկանում է մայրաքաղաքի քաղաքային ծառայությունների վերակազմավորում իրականացնել։ Թբիլիսիի սակրեբուլոյի (քաղաքային խորհուրդ) ընդդիմադիր անդամ Սաբա Բուաձեն հայտնել է, որ այդ հարցի շուրջ քվեարկությունը նախատեսված է վաղը՝ հունվարի 29-ին։

Ընդդիմադիր պատգամավորի հրապարակած փաստաթղթերից պարզ է դառնում, որ Կալաձեն 2024 թվականի դեկտեմբերի 31-ին հրաման է արձակել վերակազմավորում սկսել գույքի կառավարման, ճարտարապետական ​​ծառայության, տրանսպորտի ու քաղաքաշինության գործակալություններում:

«Այն, որ այս վերակազմավորումը քաղաքական զտում է, հաստատվում է նաև այն փաստով, որ դա չի ուղեկցվում որևէ հիմնավորումով կամ փաստարկով. նշվում է միայն մեկ արտահայտությամբ՝ «համակարգված և արդյունավետ կառավարում ապահովելու նպատակով», — գրել է ընդդիմադիր «Ուժեղ Վրաստան» կուսակցության անդամ Բուաձեն: